疾病面前，人人平等

最近身邊分別有朋友嘅至親確診癌症，而且發現嘅時候已經係末期。有一位嘅爸爸跟癌症搏鬥咗好多年，最終都係不敵癌魔，與世長辭。

記得家姐走咗之後頭一兩年，我個人變得好敏感好神經質。有時少少唔舒服或者莫名嘅身體痛症都會好容易令我聯想到癌症，然後會擔心到瞓唔著，不停Google睇吓疑似係邊一種，啲symptoms中唔中等等。會諗好多嘢: 

(大吉利是講句) 如果我有嘅話，我應該點面對呢? 點同屋企人交代? 老公同阿仔點算呢? 

當然，好多時我都係自己嚇自己。有時突然嘅頭痛胃痛其實只係經前symptoms。但係我知，呢個陰影好難一下子就搣得甩，不過我比以前放鬆咗。其實疾病面前，人人平等。就算係一個作息定時，飲食均衡，愛做運動嘅人都好，癌症話要嚟就要嚟，根本避無可避。

7月8號星期三

我去家庭醫生度做annual check-up。因為係女醫生，佢通常都會幫我check埋胸部。今次佢摸到我左胸有粒嘢，大約1cm左右。佢話要做mammogram同Ultrasound睇吓係乜。其實我冇做過㗎，所以聽到都有啲緊張。 我問林醫生通常呢啲會唔會係唔好嘅嘢嚟? 佢話其實有好多可能性，但係多數都係水泡或者係乳腺增生，叫我唔需要擔心住，做咗呢兩個檢查先。

8月22號星期六

做完兩個檢查之後，lab個醫生就話覺得呢粒嘢同周圍嘅組織唔一樣，所以有需要做埋biopsy 進一步confirm係乜嘢。佢話會send畀林醫生，到時醫生就會打畀我同我解釋。咁我就再問佢以佢經驗覺得呢粒嘢會唔會係唔好嘅嘢啦，佢就話就咁睇就覺得唔係咁suspicious嘅。其實聽到咁樣我都係有啲擔心，唯有等林醫生打畀我睇下點講啦。

8月24號星期一

2個報告 send咗畀林醫生之後，佢就打電話同我講話我要做埋biopsy。我問佢係咪粒嘢有問題呀，佢就話因為喺mammogram同ultrasound嘅片睇唔出嗰粒嘢係乜嘢，佢話唔係水泡，所以要做biopsy 去confirm嗰粒嘢係良性定惡性。 我再問多一次佢覺得粒嘢係唔係有問題，佢話佢都答唔到，我話但係除咗摸到有粒嘢之外，我冇其他symptoms喎。林醫生就話其實係可以冇任何symptoms，真係要做咗biopsy先至知道下一步點做。聽佢咁講我就更加擔心 😟

9月3號星期四

話咁快就要做biopsy。之前有問過大姑奶，佢主動話陪我去。咁我問佢當初點樣發現，係自己摸到定係醫生摸到? 佢話其實佢係做mammogram同ultrasound，之後做埋biopsy就confirm係乳癌一期。今年已經係第5年，可以話完全康復喇。咁我再問佢除咗呢樣嘢有冇發現其他symptoms，佢話冇發現任何症狀。其實我聽到都有啲驚，因為原來cancer真係可以好silent乜嘢徵狀都冇。而我除咗摸到呢粒嘢之外，又真係冇其他明顯symptoms。

我個appointment好早，入到去waiting room得我一個。個staff同我講今次會係男醫生幫我做biopsy。其實我有少少抗拒㗎，但係嗰個時間真係得呢個醫生，我又冇理由為咗咁而再約過咁煩㗎嘛。個staff話佢同另一個女同事到時都會在場，咁是但啦。2個staff都幾好，尤其是企我隔離嗰個問咗我幾次 "Are you okay?"，可能隔住個口罩都睇得出我好緊張。個醫生好專業同埋細心，佢每做一個步驟都會事先話我知佢將會做乜，我會聽到咩聲，呢啲聲係代表邊個步驟等等。個過程因為有麻醉所以完全冇感覺。報告要等一個禮拜先會知，同上次一樣，lab會直接send比林醫生。做完之後大姑奶仲比咗封利是我祝我好運tim。

希望家姐羅太同祖先好好保佑我!

(續)