家姐，生日快樂呀!
話咁快又一年喇，如果你仲在生嘅話，今年你已經46歲。有時我會諗，唔知你年紀大咗個樣會係點呢? 以前成日都會覺得，生、老、病、死四個階段係人生必經嘅，但係其實唔係人人有機會變老。所以做人要對自己好啲，要善良，要健健康康開開心心咁去生活。
前兩晚我突然間諗返起你確診嗰一年，我喺香港留咗兩個月之後要返美國。嗰朝早你幫我哋call咗車。唔記得因為咩事我哋要好趕急，所以你係咁催我哋將啲行李放上車尾箱，然後叫我哋快啲上車走。我喺上車前再攬一攬你，我攬住你嗰陣已經忍唔住係咁喊，你雖然戴住口罩，但我睇到你對眼即刻紅哂，好多眼淚喺個眼眶入面。然後你推開我叫我快啲上車。跟住你就頭也不回咁樣向住反方向行。我嗰刻同媽咪喺架的士度喊咗好耐，差唔多喊足全程。嗰晚諗起呢一幕自己都忍唔住喺度喊。我好清楚記得當時你望住我嘅眼神。其實大家心知大家點解喊得咁激動，我哋都預計到下一次再見將會係道別嘅時候，個心真係好痛，好難受，好唔捨得。到而家我都仲好難接受你嘅離開。
呢兩日諗咗好多嘢，睇咗好多資料。我有諗到最壞處。如果我真係咁唔好彩有事嘅話，我應該用一個點樣嘅心情去面對呢? 我好想畀自己一個心理準備，萬一我真係有事，我都希望自己可以用一個平靜嘅心去面對現實。而我亦都開始明白你當年嘅心情，明白你點解唔想畀我哋知道咁多關於你個病嘅細節。
若果我自己大吉利是真係有事的話，其實我都唔會想畀阿爸阿媽知道。第一、我唔想佢哋再一次承受呢種傷痛; 第二、就算畀佢哋知道佢哋又可以點? 隔咁遠都幫唔到啲乜。佢地只會得個驚字、擔心、甚至瞓唔著覺食唔到嘢，然後又會係咁問好多嘢 (你都知佢地幾多嘢問㗎啦!)，又會加重我嘅心理壓力。我唔想睇見佢哋咁樣。所以我終於明白點解你寧願比我地知少啲。
另外樂觀啲諗，我亦都覺得就算大吉利是我真係有事嘅話，我都係好早期，我相信我係一定會好番。
家姐你一定要好好保佑我冇事呀! 我仲有阿爸阿媽、阿堯、老公同Freddy。佢哋好需要我㗎! 我真係唔可以有事。
家姐希望你好好保佑我!
No comments:
Post a Comment