Google Meet見老師

成2個幾禮拜冇update，因為真係好忙呀! 踏入11月開始就係派上學期成績表嘅日子喇。上年3月至6月停課，學校完全做唔到Assessment，所以啲成績冇grade到。今年好明顯學校已經做足準備，老師有時同啲細路上small group嘅時候就會做Assessment，搞到我都好緊張呀! 今年其實佢專注咗好多嘅，係做功課就懶啲囉。其實學嘅嘢就真係預咗會少咗，呢樣就算我擔心都冇用，最緊要盡量幫佢學習到就夠。11月5號就係家長日，因為疫情嘅關係，只可以Google Meet見老師，真係慳番好多時間。我喺見老師之前已經上網check咗成績表，今年成績好好，多咗幾科above grade level，意料之外呀! Math依然最好成績，不過Reading跌咗呀，雖然都係唔錯，但係上年都係above grade level。老師對佢評語好好，話佢好踴躍答問題同表達意見。聽完都放心哂。希望你繼續比心機啦!! 

不過上個禮拜，我哋樓下個鄰居寫咗封信嚟投訴阿仔成日跑... 其實佢哋好客氣嘅，可能都忍咗好耐。冇計啦，講真而家個個stay home做嘢上堂，邊個冇壓力? 有小朋友嘅家庭真係冇辦法㗎。 咁我都寫咗封信道歉先，然後慢慢解釋番 好多有小朋友嘅家庭都難免會收到鄰居嘅投訴 (我叔仔都比佢樓下鄰居投訴)，大家都好大壓力㗎，因為小朋友喺屋企上堂，有時要上PE上Dance，甚至上跆拳道，呢啲堂都會比較嘈。

以前小朋友返學嘅時候最少有六個鐘頭嘅時間喺學校，但係而家完全冇得返學嘅情況底下佢哋活動嘅空間同時間都相對地減少咗好多，天氣好嘅話我都盡量會同佢出去一兩個鐘等佢活動下，不過真係要好睇天氣同埋時間，唯有盡量同小朋友講叫佢慢慢行唔好跑。加上佢有扁平足嘅關係，佢喺屋企用唔到個鞋墊，只可以著住crocs。咁crocs始終係啲硬膠嘅物料造嘅，行起路上嚟都一定會有聲，呢個都真係無可避免，唯有盡量叫佢行慢啲等啲聲冇咁大，就可以避免啲噪音。其實鄰居都非常之體諒嘅，加上我哋之間嘅關係係唔錯，所以好容易溝通同解決。

屎味朱古力同朱古力味嘅屎

最近最熱門嘅話題係美國總統大選，話咁快就到咗今日喇，之前一直有香港嘅朋友同埋親戚，甚至我阿爸阿媽都問我會投邊個，佢哋不約而同都希望我投Trump。香港同埋美國呢邊嘅香港人同樣都係撐Trump，直頭將Trump神化做救世主，佢哋相信Trump絕對可以幫到香港。一個主要原因係因為Trump憎大6。佢哋覺得只有Trump先可以對付大6嘅專政，為香港民主舖路。

立場新聞前幾日post咗一篇文章 - 支持特朗普的民主歪路。文章主要分析Trump嘅管治手法，係完全違背美國憲法三權分立原則。文章一出，香港網民嘅留言幾乎一面倒圍插立場同作者，大鬧作者係左膠五毛藍屍，聲言要unfollow同停止課金立場。只有少數居美港人比較理性表達意見，表示香港嘅香港人完全唔理解Trump嘅管治問題。而facebook 嘅居美港人group，有幾名網民連日嚟不停洗版撐Trump踩Biden。總之，撐Trump嘅就係黃，反Trump就係藍。呢種二元對立主義絕對冇理性討論嘅空間可言，一言堂，總之非黑就即白。

居美港人group連日嚟不停比幾個
Group友洗版，撐Trump踩Biden言論不絕

Trump會唔會幫到香港? 佢連自己同自己個國家都未搞得掂，佢仲點會理其他國家? (佢輸咗嘅話，可能監都有得坐!) 之前嘅香港民主法案都只係啲參議院眾議院嘅議員推上去，佢只係簽名嗰個。就算佢唔簽，其實十日後都會自動通過。睇睇佢實質幫過香港做過乜。香港國安法一落實佢即刻終止香港嘅特殊待遇，將香港同大陸嘅城市睇齊，以後一定會收緊批比香港人嘅美國簽證。佢唯一有做到嘅，就係列出制裁港官名單。但係呢樣嘢對香港民主進程係冇乜實質幫助。Francis Hui有一篇文章分析得好好，我絕對認同佢嘅觀點，喺度唔重複，值得一睇。可惜嘅係，佢同樣慘被圍插。

我地生活喺美國應該揀一個可以帶領到美國進步嘅有能者。Trump過往四年嚟嘅政績有目共睹，經濟民生教育醫療冇一樣做得好! 歧視問題嚴重加劇。單單講處理武肺，已經顯得佢有幾咁廢。我哋係咪仲要將未來4年嘅希望放喺一個咁無能嘅人身上，單單只係因為佢同大6抗衡? 

如果佢真係有心幫香港人，佢應該考慮比難民身份香港人，但係佢冇任何實質行動。只因為你哋覺得佢抗衡大6就係朋友。佢係一個生意人，呢一刻佢冇利益就抗衡，到大6有著數比佢你覺得佢唔會轉軚?! 佢一直都係隻老狐狸嚟，只會做有利益嘅事。

我唔撐Trump係咪就代表我一定揀Biden? Sorry，我一向覺得Biden由頭到腳由內到外都係一個仆街嚟，佢做到總統嘅話美國死得。若果要我喺屎味朱古力同朱古力味嘅屎之間揀一個，我寧願兩個都唔揀。不過講到尾，結果都唔輪到我哋話事。都係要睇選舉人票，而NY State一直係Democrats嘅天下，我哋就算投邊個都好，最終啲票都一定係歸Democrats。想了解更多，呢篇好值得睇: 美國總統大選政治地理入門。

年年著極都係嗰2件

尋日因為remote learning嘅關係，學校冇得搞Character Day parade，但係就搞咗個virtual parade叫啲小朋友著costume 影張相再放上網。

今日Halloween天氣好凍，雖然冇Trick-or-Treating，不過都畀阿仔著costume，叫做應下節。佢明明有其他costume，但係年年著極都係嗰2件，難得佢唔厭我都由佢，仲好，慳番好多 😆 要知一件都起碼$3x，年年買新嘅都幾甘。

前2年都係Curious George
下年要轉吓新造型

件太空衣由唔啱著著到啱
著足幾年佢都唔厭

一件又一件座落大草地嘅雕塑

天氣終於入秋喇，原本諗住Mr. 5 尋日專登請假可以去行山，佢懶到爆，話weekend先。於是改咗今日。

最近入咗個fb group專介紹Family social-distancing activities，真係唔錯! 我睇到一個post介紹Nassau County Museum of Art。其實正確啲講我哋係去咗sculpture park先啱，因為museum喺個park入面，要自費，而sculpture park係William Cullen Bryant Preserve嘅一部份，免費參觀，泊車都係。車程大約半個鐘左右，好近。

我哋11點15分到，由停車場一直沿住條walking trail向前行就會見到一件又一件座落大草地嘅雕塑。呢個sculpture park嘅設計好好，草地好廣闊，每件雕塑有一段距離，加上時間尚早，遊人唔多，我地戴住口罩，再加埋咁遠嘅social distance，睇得好安心。行到最後原來可以行返去停車場，啱啱一個大圈，用咗接近2個鐘。值得再去!

Tom Otterness!! 

罪不至死

最近比較多人熱切討論嘅係關於Netflix上個月播放嘅一套紀錄片 "American Murder: The Family Next Door"。 呢度記錄片其實係講關於2018年8月一單轟動全美嘅倫常命案"Watts family murders"。案中兇手係人稱好爸爸嘅Christopher Lee Watts為咗結識只有兩個月嘅小三 Nichol Kessinger而謀殺自己懷孕嘅太太Shannan同埋兩個分別只有三歲同四歲嘅女 (Bella & Celeste)。

呢單案太轟動，我記得嗰陣都有追開。其實套紀錄片我覺得拍得一般，唔夠全面分析單案，有好多細節都冇講到。佢嘥咗好多時間去剪輯Shannan同啲friend同埋佢兩公婆之間嘅text messages，呢啲其實用旁述或者用其他人嘅問話內容去取代，咁就可以用呢啲時間去講更多資料。

冇包括嘅細節都有好多，起碼冇講到兩夫妻之間嘅財政狀況。呢對夫妻2015年嘅時候已經申請破產，後尾因為Shannan搵到份新工，好積極去賺錢養家，而Chris係個mechanic，財政狀況睇落好似係有改善到佢哋嘅生活質素嘅。Shanann賺錢多過Chris，加上Shannan喺段關係入面係比較 dominant同話哂事嗰個，而Shannan同Chris屋企人關係好差，呢啲都係令到段婚姻唔係咁愉快，從而令到Chris想去go for另外一個女人嘅原因嚟。當然，無論如何，Chris都可以處理得更好。幾唔愛個老婆都好，個老婆有幾唔啱都好，都罪不至死。兩個年幼小朋友就更加無辜。

另外一提，片中播咗少少小三Nichol主動同警方聯絡之後同警方之間嘅對話， 其實喺聯絡警方之前，佢delete哂所有同chris之間，同埋佢同friend之間嘅text messages，仲有佢google search過嘅所有內容。佢係delete哂呢啲先至再去聯絡警方。喺紀錄片入面佢講嘅所有嘢都係想釋除警方對佢嘅懷疑。但係警方之後查到佢用電話同電腦google search過嘅內容，包括"已婚男士離婚娶小三"，Shannan個名，同埋"婚紗"等等，佢係期望Chris離婚之後同佢一齊展開新生活，佢講到明，新生活唔可以包括2個女。慘案發生之後佢都繼續有Google，例如: "電話公司會keep text messages幾耐？"，同埋 "啲人係咪好憎Amber Frey？" (Amber Frey係2002年另一單同類命案嘅小三)。佢自知自己一定成為眾矢之的。佢要知道佢同Amber Frey個情況係完全唔一樣。Amber雖然係小三，但係佢都係案件中嘅受害者之一，因為佢係一直被蒙在鼓裏，Scott Peterson一直都呃佢話自己Single，係後尾被揭發先迫於無奈坦白自己已婚，不過堅稱老婆死咗，所以其實Amber係無辜。Nichol唔同，雖然佢堅稱Chris話自己已經同老婆搞緊離婚，佢話Chris直呃緊佢，但係佢一早有google Shannan個名，佢一直有留意Shannan動態，佢冇可能唔知佢兩公婆嘅關係係咪真係好似Chris所講咁差。我覺得佢根本冇資格將自己同Amber比較。起碼Amber Frey都可以用番自己名過正常生活，Nichol而家仲要改名換姓避世。佢最好整埋容，佢個樣曝哂光好難唔認得！

如果有興趣想知更多整件事嘅完整細節，可以參考Reddit (1, 2)，有人提供更多更詳盡資料。又或者喺Youtube search任何案件中嘅人物都會有好多相關嘅footage。

戴住口罩影相個樣好抑鬱 😆

今日一早起身食完個好豐富嘅早餐之後，因為車程需時一個鐘，所以十二點鐘我哋就出發去pumpkin patch喇！尋晚大家一直討論去邊一個 farm好。叔仔就建議去F&W，我哋幾年前有去過，超中意！佢嗰度好大又有好多嘢玩，除咗pumpkin patch，仲有得摘菜添呀！小朋友又可以去corn maze、playground，又有pony ride同petting zoo。我好記得嗰年我哋摘咗啲矮瓜同埋肉豆返屋企超開心，又好味喎！所以我其實好想去嗰度嘅。不過Mr. 5又話驚如果去摘菜，個個摸過哂會好危險。其實我去market買餸都係個個摸過哂㗎啦，有咩分別呢？我有上網睇吓佢會點安排人流，佢就話預咗一定會排長龍，所以我哋最後就決定去姑仔講嗰個細farm - Schmitt's Family Farm on Bagatelle。

一點左右去到已經見到條街兩邊泊滿哂車，真係好不容易先搵到個位泊。一落車見到樓上一家四口行緊去條隊度，好彩唔算好長龍，好快就入到去。免費入場，但係要pumpkin patch嘅話就要比人頭費$5，包pumpkin patch、duck race，仲有可以同啲吹氣公仔影相。其實都幾搵笨，啲吹氣公仔又唔多，又細個。嗰個duck race先恐怖... 佢其實係有兩大個水桶裝住一堆rubber duckees，水桶上面有好幾條水道，啲細路仔可以放啲鴨仔上去水道上面，其實喺屋企自己玩都得。個問題係，啲水屎水咁嘅色，啲鴨勁污糟，我唔明點解啲鬼仲可以比啲細路玩... 🤮🤮🙈🙈

pumpkin patch個場好細，真係揀得落手嘅唔多，係細嗰啲南瓜就好啲，不過啲細路有得玩都已經好開心。阿仔最開心梗係見到Fruncle K，仲要連續兩個禮拜見到面。最surprise係居然撞到Pre-K老師Ms. A呀！佢同屋企人一齊嚟，真係好開心！呢個老師幫咗阿仔好多，佢性格又樂天又有愛心，我都好中意佢。

去完pumpkin patch，樓上一家就話要走。我哋幾個買咗嘢食之後就去咗一個公園食嘢傾計，又行吓湖邊，跟住就返屋企lu。呢個weekend好充實！不過比我再去嘅話都係去番F&W。

見到Ms. A超驚喜！

Ehhh... 屋企冇位擺喎

戴住口罩影相嘅小朋友好抑鬱 😆

揀邊個好呢？

阿仔揀呢個好圓好靚呀！

同Fruncle K商量揀邊個比Fruncle K媽媽

幫姑姐手揀個靚嘅

影咗當買咗

有好多一間間嘅紅磚屋仔

上個禮拜阿仔同最鍾意嘅姑丈姑姐打完minigolf之後有提過今個weekend會約我哋去pumpkin patch。所以上個禮拜阿仔成日問住今個weekend係咪去pumpkin patch。但係到咗星期五佢兩公婆都冇任何 message 喎，咁我哋都諗住應該冇得去㗎喇，於是星期六我哋就近近哋去咗Bayside一個park行下啦。

呢個名叫 Fort Totten Military Reservation嘅Park，以前係軍事用地嚟嘅，不過而家就改造成一個公園開放比公眾。呢個地方好大，有Sport Complex，又有好多好大嘅草地比人玩ball games。我哋去嗰陣見到有好多細路練soccer。而且嗰度有好多一間間嘅紅磚屋仔，以前係軍事office嚟。不過而家有好多都丟空咗 (丟空嗰啲直頭好似鬼屋咁，殘舊之餘玻璃又打爛哂)，有部分就比NYPD用，有大部分就做咗FDNY training center。有一間名叫The Castle，前身係Fort Totten Officers' Club，而家就做咗Bayside Historical Society，裡面展出有關Bayside同Queens嘅歷史文化，同埋呢座建築嘅歷史。不過我哋冇入去，淨係圍住個公園行吓就算。

到咗夜晚嘅時候，E就text老公同叔仔問聽日有冇時間去pumpkin patch。吓.... 竟然叫埋樓上一家... 即刻唔想去 🙄🙄🙄 但係阿仔咁想去都要去啦... (待續)

姑丈教識佢爬樹之後見樹就爬

好多好大嘅pinecone，阿仔執咗幾個

最中意呢個!! 直頭係Pantone色板一樣!!