(續...)
其實我好明白阿堯嘅感受㗎，因為我當年曾經都係嗰個隱形嘅人。呢種感覺如果唔係因為佢哋分手呢件事，我都差啲忘記咗。當年我同KC拍拖嘅時候，我有坦白咁同佢講我係以自修生嘅身份再考A-Level，所以我唔可以畀爸爸媽咪知我拍緊拖。第一、佢哋會覺得我應該要專心溫書考好個試，拍拖會分心。第二、我係女校出身，如果畀佢哋知道我拍拖嘅話，佢哋一定會擔心我唔知識咗啲咩人，驚我畀人呃。KC當時表示佢係明白嘅，但係我唔知係咪因為咁樣，所以佢都冇將我介紹畀佢朋友同屋企人識。 我哋拍拖嘅事只得佢同事知道 (我指佢嗰邊)，因為我哋認識嘅地方就係喺佢工作嘅地方。
啱啱拍拖初期，我覺得佢唔講比人知，可能係覺得未穩定啫。佢當年逢星期三放例假，我就會同佢去拍拖。咁有一次佢病咗，佢就話想返番去佢阿爸阿媽東頭村屋企嗰個醫生度睇，咁我陪佢睇完醫生出嚟，佢就叫我向上望，唔知一樓定二樓開咗窗嗰個單位就係佢阿爸阿媽屋企 (因為當時佢已經搬咗出嚟自己住)，咁我就詐諦大聲咁話: "Auntie!! 你個仔病咗呀! 啱啱睇完醫生呀!" 咁佢就好驚咁即刻拉我走，話: "唔好咁大聲啦，真係聽到㗎!!" 其實嗰刻我係好唔開心㗎，我覺得點解你要咁驚你屋企人知道我係你女朋友呢? 究竟係你有問題定係我有問題呢? 但係礙於當時嘅我第一次拍拖，真係冇經驗嘅關係，我冇出聲表示我唔開心，我又冇嬲佢，不過我記得心底入面係好受傷害。到後期佢識咗另外一個女仔 (即係佢而家嘅老婆) 然後決定同我分手，因為某啲原因我睇到呢個小三嘅website寫嘅blog，咁我先知道佢哋開始拍咗拖冇幾耐，佢就已經即刻將佢介紹畀屋企人。知道嗰刻我真係好似跌落黑洞咁。
第一次拍拖、第一次被背叛，我足足用咗三年時間先至復原。可能好多人都會問: 使唔使咁誇張呀? 有冇咁痛苦呀? 咁當然啦，N年後嘅今日再望返轉頭就梗係覺得自己on9啦，但係嗰陣失戀之後嘅自我價值自我認同真係低到無可再低，覺得自己唔值得人愛。不過我都好感激當年佢放生我，我先有今日嘅幸福。當年嘅我仲年輕，唔識得點去過渡同處理件事，加上阿爸阿媽已經唔中意佢 (後來考完試有向佢哋坦白我拍拖嘅事，比老豆鬧到九彩!)，根本唔想我哋一齊，所以我哋分手佢兩個都不知幾高興。佢哋甚至覺得我唔應該因為咁而傷心，但係佢哋根本唔知道我真係覺得好委屈好難過。當時嘅我諗，我係咪差到一個點，令到佢唔想俾朋友同屋企人知道有我呢個女朋友嘅存在呢? 定係其實根本一直以嚟佢只係搵我做攝時間嘅人，等佢搵到更加適合嘅人佢就唔要我呢? 我只係一個唔好彩比佢睇中用嚟騎牛搵馬嘅對象，係咪因為我未拍過拖好蝦啲呢?
一浪接一浪嘅負面情緒無從宣洩，我係靠寫blog先可以治療失戀嘅痛苦。我估唔到佢原來有睇到，仲靜雞雞用我同佢個名開咗一個email account寫信畀我 (係後期佢話畀我聽嘅)。 我記得當年有一篇blog 有提到呢種感覺，我話 "我知道我係你用嚟攝時間嘅人，你其實根本冇諗住認真同我行落去，所以我就好似菲林一樣唔見得光，唔可以畀你朋友同你屋企人知道我呢一個人嘅存在，因為我唔值得!" 然後佢其中一個email就係回應我呢篇blog，佢話佢對我係絕對認真，只係佢唔識點樣處理。佢最終都冇解釋到點解佢唔將我介紹畀佢朋友同屋企人識，所以我相信咁多年之後嘅今日其實佢啲屋企人都唔知我呢個人嘅存在。不過當然啦，呢一切已經唔再重要。因為大家都搵到各自嘅幸福，咁就已經好足夠。同埋我對佢都冇任何怨恨，我哋依然係朋友。好似佢爸爸5月嘅時候過咗身，我都有買到花牌去表達心意。
呢次失戀係我人生唯一一次失戀，因為第2次拍拖我就嫁咗比Mr. 5喇! 我記得當年自己有句格言，就係"對人對事不抱任何期望，人生可能會有更多驚喜。" 而呢句格言亦喺我人生每個大大小小階段中一一應驗。所謂"不抱任何期望"，唔係話要對人生絕望咁解，而係當我自己付出咗，我唔可以期望我會得到任何回報，抱住呢種心態做人，我嘅人生真係充滿住好多驚喜。
