有隻黑色怪獸嘅頭伸出嚟

我生於一個大家族，阿爺生前係商人，娶咗4個老婆，我有4個阿嫲，成個家族有25個仔女，子孫無數。我阿爸排行19。

一直聽阿爸講好多發生喺我哋家族嘅靈異故事。阿爸成日話，平生不作虧心事，夜半敲門也不驚。所以你問我驚唔驚，其實我都唔知驚唔驚。自己一向唔係高靈人士 (亦唔想係)，曾經遇過嘅怪事又未至於令我好驚好驚，只係覺得難以解釋。不過有一單我都差啲忘記咗，到而家諗番起都真係幾驚嚇。

細個住過唐樓，房入面近門口有個兩門大衣櫃。右邊門有塊直身鏡。嗰年我4歲，有次我好無聊咁望住塊鏡整古做怪，然後唔知做乜，我伸咗個頭入去櫃嘅右面。當時衣櫃最入嗰度好黑㗎，我無聊得滯伸咗個頭入去咆哮咗一聲。點知，突然間有隻黑色怪獸嘅頭伸出嚟向住我咆哮番一聲! 我嚇到縮番個頭出去，即刻閂番埋衣櫃門，好驚好驚。而呢件事令我驚咗個衣櫃，亦因為太驚嘅關係，我唔敢同屋企人提起。一來嗰陣仲住緊，好驚講咗出嚟唔知會發生咩事，二來覺得大人唔會信，驚比人鬧。我有時見到阿爸阿媽開衣櫃嗰陣都會裝吓睇吓佢哋見唔見到隻嘢，又冇事喎。有次阿媽打開衣櫃嗰陣我仲專登企喺佢隔離再望住同一個位置，睇吓隻嘢仲喺唔喺度，但係又冇事發生喎。

如果問我隻嘢係點嘅樣，我淨係記得佢唔係人樣嚟，佢好似一隻黑色有毛嘅獸。好惡死，咆哮嗰陣有尖牙，有啲似隻狗咁。我其實原本都忘記咗呢件事㗎，係喺facebook 一個靈異group入面有人開個poll問大家幾多歲開始意識有鬼呢樣嘢，咁我先醒起呢單嘢。我有問group啲人，有人話可能係啲流浪狗死咗周圍匿。

其實發生喺我身上嘅怪事都有好幾件係難以解釋，不過又未至於非常恐怖。呢單就真係幾猶有餘悸。

人生可能會有更多驚喜

(續...)

其實我好明白阿堯嘅感受㗎，因為我當年曾經都係嗰個隱形嘅人。呢種感覺如果唔係因為佢哋分手呢件事，我都差啲忘記咗。當年我同KC拍拖嘅時候，我有坦白咁同佢講我係以自修生嘅身份再考A-Level，所以我唔可以畀爸爸媽咪知我拍緊拖。第一、佢哋會覺得我應該要專心溫書考好個試，拍拖會分心。第二、我係女校出身，如果畀佢哋知道我拍拖嘅話，佢哋一定會擔心我唔知識咗啲咩人，驚我畀人呃。KC當時表示佢係明白嘅，但係我唔知係咪因為咁樣，所以佢都冇將我介紹畀佢朋友同屋企人識。 我哋拍拖嘅事只得佢同事知道 (我指佢嗰邊)，因為我哋認識嘅地方就係喺佢工作嘅地方。

啱啱拍拖初期，我覺得佢唔講比人知，可能係覺得未穩定啫。佢當年逢星期三放例假，我就會同佢去拍拖。咁有一次佢病咗，佢就話想返番去佢阿爸阿媽東頭村屋企嗰個醫生度睇，咁我陪佢睇完醫生出嚟，佢就叫我向上望，唔知一樓定二樓開咗窗嗰個單位就係佢阿爸阿媽屋企 (因為當時佢已經搬咗出嚟自己住)，咁我就詐諦大聲咁話: "Auntie!! 你個仔病咗呀! 啱啱睇完醫生呀!" 咁佢就好驚咁即刻拉我走，話: "唔好咁大聲啦，真係聽到㗎!!" 其實嗰刻我係好唔開心㗎，我覺得點解你要咁驚你屋企人知道我係你女朋友呢? 究竟係你有問題定係我有問題呢? 但係礙於當時嘅我第一次拍拖，真係冇經驗嘅關係，我冇出聲表示我唔開心，我又冇嬲佢，不過我記得心底入面係好受傷害。到後期佢識咗另外一個女仔 (即係佢而家嘅老婆) 然後決定同我分手，因為某啲原因我睇到呢個小三嘅website寫嘅blog，咁我先知道佢哋開始拍咗拖冇幾耐，佢就已經即刻將佢介紹畀屋企人。知道嗰刻我真係好似跌落黑洞咁。

第一次拍拖、第一次被背叛，我足足用咗三年時間先至復原。可能好多人都會問: 使唔使咁誇張呀? 有冇咁痛苦呀? 咁當然啦，N年後嘅今日再望返轉頭就梗係覺得自己on9啦，但係嗰陣失戀之後嘅自我價值自我認同真係低到無可再低，覺得自己唔值得人愛。不過我都好感激當年佢放生我，我先有今日嘅幸福。當年嘅我仲年輕，唔識得點去過渡同處理件事，加上阿爸阿媽已經唔中意佢 (後來考完試有向佢哋坦白我拍拖嘅事，比老豆鬧到九彩!)，根本唔想我哋一齊，所以我哋分手佢兩個都不知幾高興。佢哋甚至覺得我唔應該因為咁而傷心，但係佢哋根本唔知道我真係覺得好委屈好難過。當時嘅我諗，我係咪差到一個點，令到佢唔想俾朋友同屋企人知道有我呢個女朋友嘅存在呢? 定係其實根本一直以嚟佢只係搵我做攝時間嘅人，等佢搵到更加適合嘅人佢就唔要我呢? 我只係一個唔好彩比佢睇中用嚟騎牛搵馬嘅對象，係咪因為我未拍過拖好蝦啲呢? 

一浪接一浪嘅負面情緒無從宣洩，我係靠寫blog先可以治療失戀嘅痛苦。我估唔到佢原來有睇到，仲靜雞雞用我同佢個名開咗一個email account寫信畀我 (係後期佢話畀我聽嘅)。 我記得當年有一篇blog 有提到呢種感覺，我話 "我知道我係你用嚟攝時間嘅人，你其實根本冇諗住認真同我行落去，所以我就好似菲林一樣唔見得光，唔可以畀你朋友同你屋企人知道我呢一個人嘅存在，因為我唔值得!" 然後佢其中一個email就係回應我呢篇blog，佢話佢對我係絕對認真，只係佢唔識點樣處理。佢最終都冇解釋到點解佢唔將我介紹畀佢朋友同屋企人識，所以我相信咁多年之後嘅今日其實佢啲屋企人都唔知我呢個人嘅存在。不過當然啦，呢一切已經唔再重要。因為大家都搵到各自嘅幸福，咁就已經好足夠。同埋我對佢都冇任何怨恨，我哋依然係朋友。好似佢爸爸5月嘅時候過咗身，我都有買到花牌去表達心意。

呢次失戀係我人生唯一一次失戀，因為第2次拍拖我就嫁咗比Mr. 5喇! 我記得當年自己有句格言，就係"對人對事不抱任何期望，人生可能會有更多驚喜。" 而呢句格言亦喺我人生每個大大小小階段中一一應驗。所謂"不抱任何期望"，唔係話要對人生絕望咁解，而係當我自己付出咗，我唔可以期望我會得到任何回報，抱住呢種心態做人，我嘅人生真係充滿住好多驚喜。

其實答案呼之欲出

阿堯同阿T分咗手喇!  八年，真係好傷。我哋好中意阿T，當佢一家人一樣。我永遠唔會忘記佢喺家姐確診嗰年我生日，我哋三個同Freddy同阿T一齊喺西班牙餐廳食飯慶祝，佢專登買咗個好貴嘅蛋糕比我。第2年2月，寧願同阿堯返屋企煮餐飯陪我家姐一齊過情人節。有時咁啱有Roaster飛過嚟，又幫屋企人同我帶嘢。佢好錫Freddy，知我想買board game，專登去board game舖頭揀好玩嘅送比阿仔。佢心哋好善良，係好女仔嚟。知道呢個消息，真係覺得好可惜。

其實佢哋感情嘅致命傷係一直解決唔到嘅問題。就係呢八年以嚟阿T都從來冇試過 (亦冇打算) 同佢嘅朋友同埋屋企人公開過同阿堯嘅關係。就好似阿堯係一個 imaginary嘅人一樣，唔存在喺呢個世界咁。其實可以忍得到八年，我覺得阿堯都好勁。人生有幾多個八年? 如果阿堯係佢口中一個咁重要嘅人，一個影響得佢咁深、對佢最好嘅人，咁點解可以喺呢八年以嚟完全冇同任何人提過阿堯呢個人呢? 其實答案呼之欲出，就係因為接受唔到，就係因為唔夠愛。真相永遠係殘酷嘅。雖然佢冇講清楚點解，佢只係話佢嘗試過，不過真係做唔到。我明白嘅，我哋唔會怪佢，佢點都付出咗八年青春，呢八年佢對阿堯對我地都係真誠嘅。佢性格又唔係一啲好容易表達自己嘅人，如果要佢同朋友或者屋企人去提及呢一段關係，每一次都要好似榕樹頭講故咁好詳細咁解釋嘅話，其實都真係幾大壓力，真係好難於同其他人啟齒。我都只係同最close嘅朋友提過，始終社會都唔係真係好容易接納佢哋。再加上肺炎已經好耐冇得見，仲要long D，同埋睇唔到將來會有咩進展。可能大家做番朋友會好啲嘅。希望佢將來可以搵到自己嘅幸福，學懂去愛人。希望阿堯學懂多啲愛自己。

(續...)

大海上面跳躍嘅鯉魚圖案

話咁快又一年喇! 嚟咗呢度咁多年都係好平淡咁過中秋。老爺奶奶佢地又一向都唔做節，往年都係我哋話去食飯佢哋先做㗎咋，咁今年因為武肺就唔食得啦，但係老爺照舊又生果又月餅咁拎嚟比我哋😅😅我哋食完飯就同阿仔拎埋佢隻玉兔燈籠出去探吓兩老喇。

玉兔燈籠

探爺爺嫲嫲

隻玉兔燈籠係香港幾個好朋友夾份送比阿仔，大大話話都陪咗佢幾年喇，難得佢咁中意，玩足幾年都唔厭。玩完燈籠返到屋企就食吓老爺送嘅賞月食品。有月餅 (雙黃蓮蓉同五仁)、紅柚、龍眼、芋頭同嫲嫲牌雞蛋糕。其實我自己仲買咗富貴柿同布冧，仲有一個紅柚諗住送比老爺奶奶過節，不過佢哋話自己有，所以就自己食算喇。今年中秋見唔到個月光呀，因為好多雲，雖然平淡，但係都已經好滿足。

賞月食品

諗番以前喺香港過中秋真係好開心㗎! 細個嗰陣阿婆 (我哋褓姆，我哋叫佢做阿婆) 年年都會買新嘅燈籠比我玩，家姐呢就最中意煲蠟 (煲蠟係好危險㗎吓，我家姐試過差啲燒到眼，真係千祈唔好試!)。佢嗰陣好似好多細路咁，有個月餅罐裝哂煲蠟嘅用品，連火柴都有好多盒，都係阿婆比嘅 (阿婆有食煙)。我好記得佢有一個火柴盒好特別嘅，好多火柴盒都係長方盒，但係呢個係圓筒型。上面有個喺大海上面跳躍嘅鯉魚圖案，好日系好靚! 我諗家姐自己都好中意，因為個盒入面依然裝滿哂火柴，佢一支都冇用過。

以前中秋可以一家人齊齊整整咁過真係好開心。因為住近大坑，每年中秋做完節我哋一家人就會行入大坑睇舞火龍。舞火龍係大坑嘅傳統嚟，佢哋直頭有大坑舞火龍隊伍。每年中秋成個大坑嘅人都會走曬出嚟睇舞火龍。相傳係上個世紀好多年前發生咗一場瘟疫死咗好多人，大坑嘅居民得到菩薩報夢啟示，只要喺村內舞火龍就可以驅走瘟疫。於是村民就用草扎成一條長龍， 再喺成條龍身上面插滿哂點著嘅香，走勻成個大坑嘅大街小巷舞住條火龍，終於驅走咗瘟疫。自此就成為大坑喺中秋節一個傳統。 圍觀嘅人可以喺火龍停低嘅時候，掹走龍身上啲香拎返屋企當係將祝福帶返屋企。我記得阿爸都試過抆嗰幾支，不過擺咗喺廚房幾日之後就掉咗lu。可惜因為今年武肺嘅關係，大坑就取消咗中秋舞火龍，要等到年底先至有得睇。

而家家姐唔喺度，我同阿堯又唔喺香港，兩老就變得好孤獨... 不過我好感激香港嘅親戚同朋友一直對兩老嘅關心。好似A咁，專登買咗盒月餅送比佢哋，堂哥兩公婆又請佢哋食日式放題提早過節，起碼佢哋唔會太寂寞。希望有朝一日可以同阿仔睇舞火龍就好喇!

堂阿哥阿嫂請兩老食嘅日式放題，好正呀!!

咁樣學數真係學到個人好蠢呀!

終於明白點解啲鬼啲數咁鬼死屎，大佬，咁樣學數真係學到個人好蠢呀! 講真，數呢樣嘢做得多就記得㗎啦! 仲要花時間夾硬將個4拆開，推3上個7度make 10，再加埋1先計到個答案係11。真係好白痴好嘥時間，我真係唔想我個仔學埋呢啲蠢數，我寧願自己教佢算。

我記得有次去郵局寄嘢，個總數係US$59，因為我要還番$50比人，同埋我已經太多散紙，我唔想再要散紙，於是我就比$109個職員找。佢拎住我嗰$109呆咗2秒再比番$9我，我話我唔要single呀，佢仲要呆幾秒望住啲錢再望吓我: "It doesn't make sense." 我話: "It does! I don't want singles. Just give me back $50." 佢再呆多幾秒先明我講乜，真係攞命! 🙄🙄🤦🏻‍♀️🤦🏻‍♀️ 

唔怪得知學校PTA Election冇人肯做Treasurer，一來有關錢銀事嘅啲人都好驚會拿屎上身，如果唔見錢，個Treasurer一定要孭。二來佢地真係好怕計數，簡單嘅數都要㩒機，何況有時我地搞Book Fair要計埋tax，對於佢地嚟講難度極高。不過唔好話，我咁就做咗2年PTA Treasurer。其實我嘅duty好容易，都係+-×÷。

主要嘅duty係:

1) 每個月開PTA 會要present Monthly Treasurer's Report (其實都係睇bank statement照dup出嚟，不過係要寫清楚每個income同expense 嘅item係咩嚟)

2) 所有Fund-raising events都關我事，做register就梗㗎喇，埋數又係我，入錢又係我。完咗event要寫Fund-raising activity report 報告番支出同收入，最後raise咗幾多錢。

3) 寫check claim番支出比家長。

4) 1月尾交一個Interim Financial Report，6月尾要交Annual Financial Report同for 下年用嘅Proposed Budget Plan。今年因為COVID-19要延遲到10月尾先交。

反而其他工作煩好多，量多好多。不過呢兩年都幾好玩，係壓力好大囉。啲嘢多之餘真係好花時間。我都成日比N話我太過上心，話我只係Volunteer，叫我咪成日做到好似有糧出咁。所以今年唔想再做喇，兩年乜都夠哂，想平衡番個生活，想多啲時間陪阿仔，做吓自己中意做嘅事。而家好想快啲卸任，最衰COVID-19啦，如果唔係9月已經係新board做緊嘢喇!

希望下一位可以勝任呢個位啦! 

日煮三餐真係煮到個人好頹

Mr. 5敵不過我一而再再而三咁煩佢話要join番Netflix，終於喺7月開始我哋有得睇返喇! 我哋冇用返個舊account，反而用另外一個email重新開account，因為new member頭一個月係免費嘅， 我哋真係喪睇，差唔多晚晚都睇到點幾兩點。而家要比錢就更加，不過開咗學就冇得睇到咁夜喇。睇咗兩三套劇，唔記得幾多套戲同docu，所以精選以下中意嘅係咁意講吓啦。

請回答1988

我首先追咗2015年嘅韓劇 "請回答1988"，N推介嘅，我真係好鍾意呀! 佢講嘅親情倫理友情愛情都好細緻，而家啲韓劇唔再好似好多年前嗰啲喊苦喊忽咁老套又煽情。呢套劇好多位都好感動好溫馨好窩心，我直頭睇到喊㖭。有啲位都好有共鳴， 例如喺屋企排第二嘅通常都會被忽略啦，跟住個阿媽等mammogram同ultrasound報告嘅時候好擔心自己有乳癌嗰種忐忑嘅心情等等，呢啲都令到我好有感受。

除咗呢套之外，我仲睇番深夜食堂。我知好舊，其實好多年前我睇過漫畫㗎喇，跟住佢拍咗電視劇我有睇到。我唔知原來佢之後有繼續拍，仲要拍足十年 (拍到2019年)，咁我就追番哂佢喇! 除咗故事好睇之外，最中意睇佢煮嘢食。而家基本上日煮三餐真係煮到個人好頹，煮到都唔知煮乜好喇，睇套劇攞吓啲靈感都好。

另外睇咗 Diana: In Her Own Words。呢套睇到最尾我忍唔住喊，佢真係上世紀嘅一個經典悲劇人物。童年已經唔快樂，諗住遇到一個心愛嘅人下半生可以有幸福，但係原來一切都只不過係一個大謊言。點解只係簡簡單單真心愛一個人，都可以摧毀自己嘅一生。

前排停咗一排冇睇係因為想睇番之前買咗好耐但係又冇睇過嘅書，呢個禮拜我就追緊一個show叫Unsolved Mysteries。其實呢個節目好耐歷史㗎喇，由1987年開始，足足拍咗15季呀! 可想而知啲懸案多得幾誇張 (仲要已經精選過)! 以前有個主持嘅，不過佢幾年前過咗身。而家就冇主持，真係幾好睇，啱哂我!

不過呢有一樣嘢我唔係咁中意嘅就係，原來喺唔同Region嘅話Netflix係有唔同menu㗎。例如英國個menu嘅戲我地美國唔會有。因為我同D都會分享大家喺Netflix睇過啲乜，佢講話好睇嗰啲我個menu搵唔到囉。我Google過話係因為license嘅問題，所以每個地方嘅選單都唔一樣。其實咁樣嘅話電影種類相對地少咗好多，唔夠國際化。好似我偏愛日本同歐洲電影，但係少到都冇得揀咁滯。

5個人都係9月生日

Happy Birthday, Daddy!! 每年生日我都會問你感受，今年你話你終於覺得自己老喇，白頭髮多咗好多。但係你喺我眼中真係冇變呀! 咁多年同你過生日，今年係我第一次親手整生日🎂比你。因為你唔食得甜嘢，唯有整個日式芝士蛋糕比你啦，仲有你中意嘅baseball做主題添。呢個蛋糕係我第一次用電飯煲整，溫度當然冇用焗爐焗咁高，同咁快咁香，仲要㩒2次掣先整好，但係出奇地好味呀!! 😃 2仔爺都好中意!! 

今日除咗老公之外，亦係我叔仔生日。係呀，因為佢2個係twins嚟㗎，連埋我2個姑奶同姑仔老公，我地一家入面總共有5個人都係9月生日。2個姑奶同twins嘅日期仲要係隔住3日 - 即係我大姑奶係9月13、二姑奶16、twins 19，於是佢地就set個virtual 生日9月22號比姑仔。😆

由3月quarantine開始，我地就再冇一家人聚會喇。係姑奶姑仔搞過Google Meet見吓大家，傾吓計咁。真正in-person見面就只有我一得閒就拎啲物資過去6299度，又或者62間中拎嘢過嚟比我地，大姑奶同叔仔住同一棟都會見到之外。每年9月我地一家人都會一齊慶祝佢地5個嘅生日㗎，有時一齊食餐飯，有時就去睇baseball。所以趁住Twins今日生日，二姑奶就提議不如搞個Family picnic。講真，又真係冇試過一家人去picnic，地點就去Flushing Meadow Park，因為地方夠大，可以keep social distance，又可以玩好多嘢。不過嘢食方面安全起見都係預備自己個份，唔會potluck 喇。

阿仔就最開心啦! 又有狗仔玩，又見到佢最中意嘅Fruncle K，佢係咁玩，又教佢爬樹。練大咗個膽佢試完又試，超開心! 好彩我帶定啲嘢比佢玩咋，因為我地坐個位置喺正個playground隔籬，勁多細路，好多都唔戴口罩囉，而且playground都唔會有人消毒，而家疫情仲未穩定，簡直係病毒溫床嚟。Freddy都好聽話，佢知冇得玩，就算見到佢2個cousins玩佢都冇投訴。不過見到Fruncle K佢已經好滿足。

希望病毒快啲走，我地一家人可以再多啲見面啦! 

一隻手掌永遠拍唔響

同D傾開偈，講開佢英國同我美國呢邊都開學，大家都講話唔想自己小朋友同某某同班，因為我地唔想同佢哋嘅家長打交道。今年同班嘅有阿仔嘅3個好朋友，佢地由K班已經開始同班，真係好有緣呀!! 不過同時亦有主席個女同din婆個女，竟然仲有同🐷隊友個女囉!!! 好彩今年🐷隊友8月嘅時候成家已經返咗家鄉正式撤離美國咋! 如果唔係今年一定好煩。其實有時唔係想成日嫌人哋呢樣嗰樣，但係有啲家長真係好奇怪。不過調轉咁講，我哋覺得人地有問題嘅同時，或者人地都覺得我哋都有問題。

喺Freddy好細個嗰陣，我曾經識到一班喺NY嘅香港媽媽，大家嘅小朋友都差唔多大。開初小朋友仲細都仲會約出嚟玩，或者開生日會都會invite大家，希望啲細路有機會一齊玩一齊成長。到佢地開始返學，schedule好忙，每個家庭住唔同區又好難約，跟住近年冇人再搞生日會或者gathering，愈嚟愈少見，大家就愈行愈遠。而家為止我仲有同埋仲想keep contact嘅得兩個媽媽 - C & P。 另外當然仲有我嘅牙醫朋友B，NJ嘅N，同埋近年識嘅C。

其實曾經有一個媽媽同我好close。我地講好多心事，好關心對方。可惜嘅係，相處耐咗發覺其實好多價值觀都唔一樣。佢同佢老公又唔中意我個仔啦 (佢地直頭覺得我個仔係生番，或者喺佢地眼中我係一個好失敗嘅媽媽，唔識教仔啦! 不過成group人當中只係得佢兩公婆討厭我個仔，其他人完全冇)。之後佢又講過同做過一啲令我幾唔開心嘅事，最後我把心一橫決定疏遠佢。其實我都有一刻覺得可惜同內疚，話哂大家都曾經好close過。直至今年年頭，我喺C口中知道佢嘅新近況，而呢件事都算係件值得高興嘅事嚟。其實C冇心講比我知，不過因為C一直都覺得我地兩個好close，所以C先以為我都知道。當我同C表示對方冇同我講嘅時候，C都好surprised。當然，當事人有權選擇唔同我分享，而既然對方同我嘅諗法一致，大家對彼此冇哂信任嘅話，咁我疏遠佢呢個決定係正確嘅，我唔需要覺得可惜同內疚。所以都好多謝C講比我聽，知道咗之後反而個心輕鬆咗。

Freddy啱啱讀PreK嗰陣我都會期望可以喺學校識到唔同國籍嘅媽媽，如果啱傾大家又可以成為交到心嘅朋友。不過自從經歷過啱啱提過嘅香港媽媽，同埋學校🐷隊友件事之後， 真心覺得人大咗會更加清楚自己需要邊一類型嘅朋友。我覺得我同D都有一個共通點，就係當我哋同人哋相處嘅時候，一冇咗一種安全感嘅話，我哋本身潛藏嘅防護機制就會撻著，然後就好似警告我哋要同呢一個人疏遠，避免自己再受到不必要嘅傷害咁。

D講得啱，而家我同佢都各自喺英國同美國見唔到面，平時就咁WhatsApp喪傾計冇乜嘢咁，但係假如有朝一日我哋喺同一個國家，多咗接觸，相處耐咗，或者又會衍生同樣嘅問題，跟住會嫌棄對方，然後疏遠。

人嘅關係可以簡單可以複雜。不過有一樣嘢不變嘅係，一隻手掌永遠拍唔響，任何嘅關係都需要對方願意同自己一齊共同經營先可以繼續落去。People come people go，夾到嘅話咪一路做朋友，夾唔到都無謂勉強自己勉強對方。

人生苦短，做人最緊要開心就夠。

喺屋企安全啲

終於開學喇!! 今年係好特別嘅一年， 因為應該全年都係會喺屋企remote learning。原本係上星期四開學嘅，Mayor postponed到今日。我打算比佢全年都remote，我係full time mom可以喺屋企睇住佢，同埋就算返學都係用device remote learning，咁梗係喺屋企安全啲啦。 

學校雖然跟DOE嘅指引，揀咗Model Two去做blended learning，但係學校話就算hybrid students返學都唔會有in-person teaching，佢地都只會用device remote上堂。我知有好多家長都好唔滿意學校呢個安排，但係其實我覺得學校係經過深思熟慮，考慮過好多因素先有咁嘅決定， 我相信呢個係學校認為對所有學生、家長同老師嚟講係最妥當最公平嘅安排同決定。普遍嚟講好多家長都會覺得 in-person learning一定會比Remote Learning學得更好更多，但係如果有啲家長真係希望小朋友喺屋企remote learning嘅話，咁喺教學方面其實學校好難保證做到兩邊都一式一樣，令到所有學生都吸收同一個level嘅知識，最終學校、老師、學生同家長都係要面對好沉重嘅壓力。所以校方為咗公平起見，決定將學校當做一個day care center，淨係睇住啲小朋友，但係就唔會有in-person teaching，school hours由原本8:20-2:40pm縮短為8:30-2pm。每班只得6-7小朋友，由一個老師同一個para睇住。

呢個禮拜輕鬆好多，起碼冇功課做先啦。10點鐘上堂，仲要係得activities。今日好易過，朝早老師同家長brief吓今年會學乜，schedule會係點，之後嘅資料都係比hybrid students & parents，講吓下星期一Hybrid students返學嘅logistics係點。然後老師就同啲小朋友傾計，打招呼，介紹吓自己咁。今年Freddy嘅老師係Ms. Haber呀!! 佢咁多年都係教2nd Grade，我做PTA呢2年都有接觸過佢，知佢教得好好同埋好好人。

諗返起半年前開始嘅remote learning，真係有苦有甜。由開初亂到九彩，壓力勁大，到spring break之後學校因為家長嘅意見而改變咗成個策略，令到remote learning都好順暢同輕鬆，學校又提供好多學校習資源同埋好supportive，然後我哋慢慢習慣咗個模式。所以我相信即使今年全年都要remote learning嘅話，問題同壓力應該會比上年嘅少好多。當然我都會有擔憂啦，始終佢2nd Grade，學嘅嘢又會更加多更加深更加複雜，又要準備下年3rd Grade嘅state test。

希望佢今年繼續努力畀心機學習啦! 加油呀!! 

口水多過浪花

Dear Freddy:

媽咪好耐冇寫信畀你喇! 對上一次寫信畀你已經係幾年前嘅事。眨下眼你就已經七歲喇! 唔再係一隻傻豬b仔，不過七歲嘅你依然係咁古靈精怪，口水多過浪花，大個咗，乖咗啲啦，但係可唔可以唔好咁多咀?

8月尾帶你去Dr. Liu 7歲check-up， 足足半年冇見Dr. Liu喇，佢個診所依然好多人! 我哋個appointment係兩點半，都等咗差唔多45分鐘先到我哋。你呢5個幾月重咗3磅，長高咗。其餘視力、聽覺同血壓一切正常。Dr. Liu都好surprised 你竟然冇近視冇遠視冇散光。 其實我覺得係遲早嘅事，因為你娘親我同你Daddy都係四眼嘅。仲加埋你而家睇多咗電視同埋電腦。不過我都睇實你唔畀你睇咁多同黐咁埋個screen睇，希望你就算四眼都唔好咁快啦。然後佢check埋你耳鼻喉，聽埋個肺，睇埋脊骨，話你樣樣都好健康。唯獨係你個扁平足就一樣係平哂 😥 因為停課之後冇乜機會出街，咁即係冇乜機會著鞋墊，你喺屋企又唔使著鞋嘅關係，隻腳又平番哂，唔得呀。Dr. Liu 話唯有買對鞋專係畀你喺屋企著嘅，放埋鞋墊入去，訓練番對腳。最後買一對crocs畀你喺屋企著，總之就要等你對腳有番個arch位啦。

睇完之後就約定下年個appointment，跟住理應係去驗埋血嘅，但係姑娘畀張form我之餘，仲畀咗隻杯同個tube我，話要另外搵一日帶埋urine sample 去驗血，仲講到明一定要係你朝早嘅第一篤。點解同往年唔一樣嘅? 我哋冇得即日去驗血，於是就同你去做新鞋墊。今次去Dr. Kwong介紹嗰間，佢話有receipt/referral 就$200, 如果唔係就$280。我即刻打番去Dr. Kwong度叫姑娘幫我fax張receipt去，慳番$80! 呢間真係平好多囉，平成4倍呀! 上次嗰間足足使咗我地$900 😭😭 因為保險唔包㗎，肉都赤。呢間都唔包，但係$200，平好多。佢話4-6個禮拜造好。

因為要就Daddy返工時間，佢忙到甩轆，所以今日先有時間帶你去驗血。開初以為要make appointment，原來就咁walk in就得。同你講清楚叫你驗血嗰陣千祈唔好望住人地同你做乜，我應承你畀你喺我電話度睇Netflix (平時係絕對嚴禁嘅!!)。你都好乖呀，雖然開頭你勁想望住同埋想捉住姑娘隻手唔比佢插針，我叫番你focus返睇Netflix，如果唔係我熄機，你就好乖乖咁畀人抽血喇。你仲記唔記得你5歲嗰次抽血呀? 你直頭狂性大發咁發哂癲狂爭扎狂喊，連埋我要5個人捉實你先搞得掂，你仲驚到想咬姑娘隻手... 你反轉間診所咁滯呀🤦🏻‍♀️🤦🏻‍♀️ 嗰次真係人都癲。上年同今次你都好乖好合作，真係大個仔喇!

為咗獎勵你，之後買咗最新嗰本Dog Man (Grime and Punishment)畀你添，你開心到爆，返屋企一下子睇完 😆! 

2020年9月新書

裡面究竟有咩呢?

下星期三正式開學喇! 今個暑假真係難忘，邊度都冇得去，只可以日日同阿仔落街踩吓Scooter，行去買吓餸，悶到發毛。不過好彩我地weekend都可以行吓山，有時去BJ's 或者Costco買吓餸，叫做好過冇啦。每年呢個時候我都會揀定啲相整下一年嘅calendar，今年真係揀唔落手，唔係remote learning相就係口罩相，真係好想㩒個掣就結束2020年。

今朝一早起身同Freddy 返學校拎materials，再見番學校嘅老師同staff真係好開心! 尤其是Ms. Z升咗職做Secretary 我真係好開心呀! 佢同Jenny係全校入面我最close同最中意嘅員工嚟。袋嘢好重呀!! 一個印有學校logo嘅索繩袋入面裝咗好多嘢，多到直頭有兩個保鮮袋嘅嘢都放唔到入去，要另外拎住。裡面究竟有咩呢?

有一本超厚數學書啦，有數學工作紙、作文紙、有音樂堂嘅instruction同小樂器、PE堂要用嘅用具、Science 就有包泥、膠杯同種子，仲有一袋文具，同埋Peace corner嘅stress ball，等等。咁好嘅學校去邊度搵?? Freddy好開心逐袋拎出嚟睇，佢應該好期待開學! 不過可惜今年冇得返學，只可以Remote learning，希望下學期可以啦! 咁就2nd grade喇，希望你繼續努力，比心機學習呀!! 加油!!

終於知道 "如釋重負" 係咩感覺

上星期四 (9月3號) 大姑奶陪我去做biopsy，護士話我要等一個禮拜先有報告出，等嘅過程真係好煎熬。

雖然好擔心，但係其實我瞓得幾好，食得都唔錯，有時間的話我都係不停咁睇乳腺纖維瘤同埋乳癌嘅資料。想畀定個心理準備自己，如果真係壞消息嘅話起碼都可以用個平常心去面對。壞消息當中起碼叫做有好消息，知道一定係早期，一定醫得番好。我唔敢同阿爸阿媽提我做咗Biopsy嘅事，知佢哋實會係咁問我: "有報告未呀? 點解咁耐都未有㗎?" 唔想加重自己嘅心理壓力。

我有sign up到個lab嘅Patient Portal，好方便㗎，佢哋會upload哂我做過嘅所有tests同報告。個Portal好secure嘅，要入password先至可以睇到個report。其實我呢幾日已經不停sign in入去check。其實正常程序應該係由林醫生打畀我同我傾個報告嘅，但係我唔醒起林醫生星期四唔開㗎... 即係話我仲要等多一日先至知道個報告係點。除非今日我喺Patient Portal嗰度預先睇到個報告。

今日一早起身已經每15分鐘check 住個Portal。到咗下晝3點鐘都仲係乜嘢報告都冇。我決定打電話去lab嗰度問。職員話就算報告已經ready，都要等幾日先upload上Portal㗎囉... 🙄🙄你話係咪吹脹吖! 職員問使唔使send比我，咁梗係要啦，佢轉頭就即刻email咗比我。

等email嗰陣個心跳快到就嚟會跌出嚟咁，我原本寫緊嘢，隻手震到集中唔到。終於收到個報告，頭一版嗰幾段字只係解釋番當日做biopsy成個程序，第2版先見到有一句: 

The pathology diagnosis is reported as: "Fibroadenoma"

哇，終於知道 "如釋重負" 係咩感覺呀。我叫Mr. 5睇報告，佢好神色凝重，睇到最後先鬆一口氣。Freddy就仲開心。我記得上個禮拜做完biopsy個傷口痛，佢想走埋嚟攬我都唔得，我有解釋比佢聽媽咪做咗檢查，要confirm 係咪cancer，佢直頭唔想再聽落去，即刻轉話題。可能因為家姐嘅事嚇親佢，所以佢一聽到cancer呢個字，佢就避開唔想我再講落去。今日一話佢知我冇事，佢好開心咁攬住我錫呀!

我會繼續好好保護自己、照顧自己身體。有健康先可以行更遠嘅路! 要繼續健康飲食同做運動，最緊要就係要開開心心!! 

傻🐷仔寫咗張卡送比我

一隻跟一隻成條隊咁游水

NY疫情稍為緩和，我同Mr. 5講，我地冇得去Roadtrip都應該要行吓山，去郊外呼吸吓新鮮空氣，等自己都健康啲強壯啲，我地再日日喺屋企郁都唔郁就真係好快變豬喇。難得天氣仲係咁好，今年夏天又特別長，於是每當星期六係好天，我地就會去Upstate 或者Long Island 嘅郊外行吓。其實NY有唔少地方都好family-friendly㗎! 回顧吓先!!

Rockefeller State Park Preserve

位於Upstate, NY。每次去都有一家大細或者帶住毛孩嘅人士行。行到中間有個湖，景色好靚。樹蔭幾多，唔怕太曬，而且所有trails都connected嘅。

Caleb Smith State Park Preserve

呢個我哋今日第一次去，喺Long Island嘅Smithtown。佢同Rockefeller State Park Preserve好似，又係有個湖，呢個湖好多鴨，咁大個女都係第一次睇到啲鴨一隻跟一隻成條隊咁游水，仲要係咁講嘢。

Donald M. Kendall Sculpture Gardens

呢個唔係一個park嚟，佢係一個Sculpture Garden，設於百事公司喺Upstate, NY嘅總部。呢個地方真係好值得推介! 一來、好少地方有咁多同埋咁巨型嘅雕塑可以睇， 二來、佢嘅面積好大，有好多地方可以俾小朋友跑嚟跑去。最重要嘅係, 免費入場!!

一家人睇完一個雕塑，然後一齊去搵吓其他雕塑喺邊，都係一件好有趣嘅事嚟㗎。同小朋友一齊去研究"呢個雕塑似乜嘢呢?" "見唔見到呢個雕塑上面刻咗啲咩動物呀?" 我個仔仲好鍾意睇啲雕塑上面嘅昆蟲，就咁望住佢地爬吓爬吓都已經好開心。個Garden仲種咗好多好靚好特別嘅花草樹木。我記得兩年前去睇嘅時候係十月，天氣比較涼。我哋睇完之後行去攞車嘅時候仲見到有一個area有好多大大少少唔同種類嘅蘑菇添!! 好得意㗎!

Stone Quarry Hill Art Park

第一次去係2017年10月，真係好中意! 同Donald M. Kendall Sculpture Gardens一樣，都係有好多Art Installation。不過呢個嘅面積再大啲，而且有山坡，真係可以通山走，個景好正!! 佢就冇硬性規定入場人士一定要比錢，不過有個suggested donation每人$5，但係我覺得絕對值回票價。

其實仲有好多，下次繼續回顧!